கடந்து போ

எல்லாம் கடந்து போகும்
எல்லாவற்றையும் கடந்து போ
எல்லாம் மறந்து போகும்
எல்லாவற்றையும் மறந்து போ
என்பு போர்த்திய உடம்பு
எல்லாம் உதறிய மனது
பிறந்தது ஒரு நிகழ்வு
இதில் வாழ்க்கைகென்ன கணக்கு
இங்கு ஏன் வருகுது பிணக்கு?

மரணம் வரும் ஒரு நாளில்
துயரம் தீரும் அந்நாளில்
துவண்டு துவண்டு வீழ்வதென்ன?
கானல் நீருக்காய் வேண்டுவதென்ன?
புல்லும் பூண்டும் தழைக்கிறது
பறவை விலங்கும் வாழ்கிறது
வாழ ஒரு பிடி அரிசி
சாக ஒரு பிடி சாம்பல்
இதில் ஏன் இத்தனை குழப்பம்?
இங்கு எதற்கு இத்தனை மயக்கம்?

செத்து செத்து மடிவதற்கு
பிறந்தவுடன் மடிந்திடலாம்
ஒன்பது மாத தவத்தினை
வெளி கொணரும் வலியினை
இல்லாமலே செய்திடலாம்
பிறந்தவர் இறக்கத்தான் வேண்டும்
இறக்கும் முன் வாழ்ந்திடத்தான் வேண்டும்
இதில் ஏன் இத்தனை போராட்டம்?
இங்கு எதற்கு வந்தது தள்ளாட்டம்?

உன்னை கடந்து உன்னை பார்
உலகை கொஞ்சம் உற்று பார்
இழந்ததை மறந்திடு
இருப்பதை கொடுத்திடு
வாழும் வரை வாழ்க்கையில்
நம்பிக்கையுடன் வாழ்ந்திடு!

உறக்கம் வரும் வேளை..........
எல்லாம் கடந்து போகும்
எல்லாவற்றையும் கடந்து போ
எல்லாம் மறந்து போகும்
எல்லாவற்றையும் மறந்து போ
என்பு போர்த்திய உடம்பு
எல்லாம் உதறிய மனது
எல்லாம் உதிர்த்து போ!!