தேவன்கள் இல்லா நகரம்

 

குடிப்பது அவனா அவளா
என்று பார்க்கிறீர்கள்
அவன் என்றால்
பரிதாபமோ இல்லையென்றால்
ஓர் அலட்சியமோ
அவள் என்றால்
உங்கள் கற்பனைக்கு
தீனிக் கொடுக்கிறீர்க ள்
எழுதுவது அவனா அவளா
என்று பார்க்கிறீர்கள்
அவன் என்றால்  

எழுத்தை மெச்சியும்
அவள் என்றால்
அவளை எடைபோட்டும் செல்கிறீர்கள்
புத்திக் கொண்டு பேசுவது
அவனா அவளா என்று பார்க்கிறீர்கள்
அவன் என்றால் புகழ்ச்சியும்
அவள் என்றால் இகழ்ச்சியும் செய்கிறீர்கள்
சாலையில் விரைவது
அவனா அவளா என்று பார்க்கிறீர்கள்
அவன் என்றால் சாதாரணக் காட்சியாகவும்
அவள் என்றால் 

சிறப்புக் காட்சியாகவும் காண்கிறீர்கள்
எல்லாவற்றிலும் யாரோ
ஓர் அவளைத் தாழ்த்திவிட்டு
உங்கள் அவளை மட்டும்
தேவதை என்கிறீர்கள்!
 

தேவன்கள் இல்லாத நகரத்தில்
தேவதைகள் என்ன செய்வார்கள் பாவம்?