சுடுகாடே மிச்சம்

ஒரு முதல்வரை 75 நாட்கள்
மறைத்து வைத்தபோது
நீங்கள் விழித்துக்கொண்டிருக்க வேண்டும்

ஓட்டுகளை பெறாமல்
புறவழியில் ஆட்சியை பிடித்தபோது
நீங்கள் விழித்துக்கொண்டிருக்க வேண்டும்

கல்விச்சாலைகளை மூடி
வீதி முழுக்க சாராயக்கடைகளை
திறந்த போது
நீங்கள் விழித்துக்கொண்டிருக்க வேண்டும்

அந்த மாணவன்
மேம்பாலத்திலிலிருந்து குதித்து
தற்கொலைச் செய்துகொள்ள
கண்டுக்கொள்ளாமல் சிரித்தபோது
நீங்கள் விழித்துக்கொண்டிருக்க வேண்டும்

விவசாயிகள் போராட்டத்தில் சாக
மீனவர்கள் குண்டுபட்டு சாக
எதற்காகவும் இல்லாமல்
தம் பதவிக்காக டெல்லி விரைந்தபோது
நீங்கள் விழித்துக்கொண்டிருக்க வேண்டும்

எதையும் செய்யாமல்
கடவுளாய் உருவகப்படுத்தி
விளம்பரம் செய்துகொண்டபோது
நீங்கள் விழித்துக்கொண்டிருக்க வேண்டும்

நீட்டின் போர்வையில்
மாநிலத்தின் கல்வியுரிமை பறிக்கப்பட்டபோது
குனிந்து கும்பிடு போட்டுக்கொண்டிருந்தபோது
நீங்கள் விழித்துக்கொண்டிருக்க வேண்டும்

நீட்டின் மெத்தனத்தில்
உயிர்கள் பலியானபோது
தனியார் அமைப்பின் மீது பழிதூக்கிப்போட்டபோது
நீங்கள் விழித்துக்கொண்டிருக்க வேண்டும்

அணையை காக்க
தெர்மாக்கோலில் படகுவிட்டு
அதையும் சில லட்சங்களென
செலவு கணக்கு எழுதியபோது
நீங்கள் விழித்துக்கொண்டிருக்க வேண்டும்

300 மரங்கள் நட
எட்டு லட்சம் செலவென்று
கல்வெட்டு செதுக்கியபோது
நீங்கள் விழித்துக்கொண்டிருக்க வேண்டும்

99 நாள் நடந்தப் போராட்டத்தில்
100 ஆவது நாளுக்கு
144 போட்டபோது
நீங்கள் விழித்துக்கொண்டிருக்க வேண்டும்

குருவியைக் கூட சுட
உரிமையல்லாத நாட்டில்
மனிதர்களை மயிர்களாக கருதி சுட்டபோது
நீங்கள் விழித்துக்கொண்டிருக்க வேண்டும்

உயிருக்கு ஒரு தொகை
உறுப்புக்கு ஒரு தொகை
என்று பேரம் பேசிய போது
நீங்கள் விழித்துக்கொண்டிருக்க வேண்டும்

ஜல்லிக்கட்டின் நிறைவில்
கட்டவிழ்த்த வன்முறையின்போது
நீங்கள் விழித்துக்கொண்டிருக்க வேண்டும்

எதற்கும் விழிக்காமல்
எல்லாவற்றையும் நகைச்சுவையாய்
எடுத்துக்கொண்டால்
நாளை விழிக்கும்போது
#சுடுகாடே மிச்சமிருக்கும்!