விடுதலை

தன் அறுபதாவது
வயதில் கணவனை
இழந்தக் கோமுப்பாட்டி
அன்று மலர்ந்த மலர் போல
சிரித்தாள்

உங்க பையனுக்கு
படிப்பும் வராது
ஒரு மண்ணும் வராது
என்ற ஆசிரியரின்
வார்த்தைகளில்
வெளியே வந்த விஜயன்
இருபது வருடமாக
வெள்ளித்திரையின் நாயகனாக
பல்வேறு பரிணாமங்களில்
மின்னிக்கொண்டிருந்தான்

விஷச்சாராயத்தில்
அப்பன்
இறந்தச்செய்திக்கேட்டு
அழும் அம்மாவின்
கண்ணீர் துடைத்த
பத்துவயது மகேஷ்
நண்பர்களுக்கு
இனிப்பு வழங்கினான்

வயிற்றில் உதித்தக்
கருவுக்காக
கணவனின் பேராசையில்
அப்பனை கடன்காரனாக்கிய
மகள்
சட்டென்று ஏற்பட்ட
கருச்சிதைவில்
விட்டு விடுதலையாகிப்போனாள்

பின்வாசல் வழியாக
மந்திரியான அழகேசன்
சாராய வியாபாரத்தை
அரசுடமையாக்க
முழுப்போதையில் வந்த
லாரியொன்று
சொகுசுக்காரில் சென்ற
அவனின் வாரிசுகளைக்
கொன்றுபோட
அழகேசன் சித்தம்
முறிந்துப்போனான்

காடழித்து
வயிறு வளர்த்த
கஞ்சா கருப்பன்
சாமியாராக
மகிழுந்தில் உலாவர
ஓங்கி ஒலித்த இடியொன்று
உயர்ந்த மரத்தை முறித்து
வண்டியின் தலையில் வீச
அந்தக்கடைசி மரத்தைக்
காசாக்க முடியாமல்
அவன் நசுங்கிப்போனான்

மனிதர்களுக்கும் இயற்கைக்கும்
உள்ளும் புறமும்
எந்த விடுதலையும்
இழப்பில்லாமல்
கிடைத்துவிடுவதில்லை!

#விடுதலை