இறுதியாசை

அன்று நான்
இறந்து போயிருந்தேன்
ஏற்கனவே பலமுறை
நான் இறந்திருக்கிறேன்
ஆச்சரியமாக
இன்று என் உடலை
நடுக்கூடத்தில் வைத்து
போர்த்தியிருந்தார்கள்
விருப்பமான படிப்பை
தடுத்த அப்பா
விரும்பிய காதலனை
மறுத்த அம்மா
சுதந்திரம் மறுத்த அண்ணன்
நடத்தையை
புறம் பேசிய உறவுகள்
மனதைக்
கொன்ற கணவன்
வெளிநாட்டில்
தங்கிவிட்ட பிள்ளைகள்
ஏமாற்றம்
தந்த நட்புகள்
எல்லோரும்
குழுமியிருந்தார்கள்
எல்லோரும்
என் மரணத்தைப் பேசினார்கள்
ஒருவர் கூட
பலமுறை கொன்ற
நிகழ்வுகளை பேசவில்லை
சலசலத்த கூட்டத்தில்
எரிப்பதா புதைப்பதா
எது வழக்கம்
என்று யாரோ கேட்க
“ஆச்சிய எரிச்சிடுங்க
பொண்ணா பொறந்த
இந்தப்பொறப்பே வேணாம்
சாமீ,
செத்தப்பிறகாவது என்னை
எரிச்சிடுங்க
இந்த காத்துல கலந்து
போயிடணும் சாமீ!”
என்று ஆச்சி சொல்லிச்சு
நேத்து என்றாள்
அவளின்
ஐந்து வயது பேத்தி!
கிளறிவிடப்பட்ட
மரணங்களின் நினைவில்
நிசப்தத்தில் உறைந்தன
உறவுகள்!

#இறுதியாசை